أسرار نجاح عمل طالب الترجمة
#سلسلة_أسرار_نجاح_عمل_طالب_الترجمة #السر_رقم5
ياترى شو ميزات #قسم_الترجمة عن غير أقسام؟ شي مرة خطرلكن شو بيميز قسمنا عن باقي الأقسام؟
تعوا لإحكليلكن شو السيرة .. هدا يا أصدقائي أهم ميزة بقسم #الترجمة إنو هاد الفرع كتير حلو يندرس بشكل جماعي يعني إنو تعملوا جمعة رفقات وتقعدوا تدرسوا مثلا مادة #تحليل_نصوص أو #مادة_ترجمة أو أي مادة تخصصية بالقسم .. ولهيك هاد القسم من الأقسام الحلوة جداً #لتكوين_أصدقاء_وزملاء_للمستقبل .. والأحلى إنو بالمستقبل رح تلاقوا إنو كتير مهم للمترجم يكون عندو محيط معروف فيه وإلا ماحيستلم شغل بحياتو.. ومن هون انطلقت ب #السر_رقم5 .. طالما نحن مترجمين كيف لازم نكون معروفين بالوسط الي نحن فيه؟
#الجواب: مارح تتوقعوا إنو الجواب هو #المساعدة #التعاون #التطوع ياأصدقائي وصديقاتي أهم شي بقسم الترجمة إنك تكون شخص #متعاون سواء مع زملاءك بالدفعة (إذا كنتوا مازلتوا طلاب) بتشارك المعلومات والمحاضرات وملاحظات الدكاترة أو إذا كنتوا خريجين فبتشارك الأخبار المترجمة أو إذا شفت ترجمة عجبتك أو مقطع بيحكي عن المترجمين تشاركو أو وظيفة تعمل منشن لزميل بتحس بتلبقلو ...
#شو_فوائد_المساعدة_والتطوع: مابتتخيلوا أديش هالشي رح يفيدكن لحياتكن المستقبلية ولبناء مرتبة اجتماعية حلوة (عداكن عن الجانب الانساني الي كلنا منعرفو) .. لكن فيني قلكن وعن خبرة ..
- الشخص الي بيشارك معلوماتو مع رفقاتو بيكون #محبوب من رفقاتو وبيدعولوا عالأقل بالخير إذا ماقدروا يقدمولوا شي .
- الشخص الي بيساعد وبيمنشن رفقاتو على وظائف أو كورسات أو مبادرات مجانية أو أي شي من هاد القبيل رح يضل رفيقو حافظلو ياها ورح #ترجعلو إذا مو من نفس الشخص فمن أشخاص آخرين.
- الشخص المتعاون غالباً بيصير هو #الأميز ضمن الدفعة وهاد الشي بيخليه أنسب ليبني علاقة ودية مع الدكاترة وهالشي كتير مفيد لبعدين، وكمان حيكون دايماً اسمو بينذكر كل ما سمع شخص عن وظيفة ترجمة بيقول كان معنا فلان والله..
- أي #منحة مستقبلاً حيطلبوا منك #أعمال_تطوعية أو أي مساعدات قمت بعملها خلال مسيرتك العلمية وبوقتا حتقول ياااريت بس عامل لو شي بسيط أذكرو ضمن #رسالة_الدافع.
- أي #منحة_مستقبلاً رح تطلب منك #رسالة_توصية من دكاترتك بالجامعة، بوقتا حتقول ياريت وقت قال الأستاذ مين بييشاركها مع الزملاء قلتلو أنا وبنيت علاقة ودية إقدر أطلب منو رسالة توصية لجامعات برا..
- الشخص الي بيبيض الملاحظات وبيصور للزملاء أو بيرجع عالبيت بينضد وبيشير مع الزملاء هو #الأقدر_على_حفظ_وشرح_هالملاحظات من أي حدا وصلتو هالمعلومات منضدة جاهزة...
- الشخص المعطاء الي دايماً بيشارك المعلومات مع زملائه، يستحيل لما يطلب شي حدا يردو (لأنو #مسبّق)..
من خلال #خبرتي_بمبادراتنا_الانسانية الي أطلقناها #عبر_الفيسبوك من عام 2010 ولليوم الحالي فيني قلكن:
1- من خلال هدول المبادرات الإنسانية ألف الحمدلله أغلب الأدمنز الي كانوا معنا وينقلولنا أخبار المحاضرات والملخصات الأسبوعية كانوا من الأوائل بالجامعة وفي منهن صاروا معنا مدرّسين بفريق أكاديمستس.
2- كل الدكاترة الي كانوا وقت مبادراتنا عالفيسبوك كانوا معتمدين على غروباتنا لتوصيل ومشاركة المعلومات مع الزملاء ولهيك كانت علاقتنا ودية معهن جداً.
3- إجتنا وظائف عمل ترجمة للأدمن وللطلاب من خلال المبادرات وقمنا بنشر بعض منها والبعض الآخر تم تسليمه للمحيط، وهاد لحالو خط ممكن يكون لبزنس منفصل.
4- إجتنا عروض تنزيل إعلانات للمعاهد ولأساتذة...الخ وهدا لحالو خط ممكن يكون لبزنس منفصل.
5- بؤمن وبشدة إنو رب العالمين دايماً بيكون مع الشخص المعطاء ومابيضوعلو تعبو وبعتبر كتير منح وعطايا كانت من رب العالمين لإلنا بسبب مساعداتنا بهاد القسم ..
6- صار عندي تاريخ حافل بالأحداث التطوعية الي فيني احكيها بفخر أمام أي حدا بيقلي شو عملتي بمسيرتك الدراسية.
ياجماعة الخير... الجامعة فترة مؤقتة ومابيضل إلا الذكر والأثر الطيب، حاولوا تبنوا اسمكن بالخير خلال مسيرتكن التعليمية .. حاولوا تبنوا مرتبتكن الاجتماعية كمترجمين من قبل التخرج لأنو المترجم بدون معارف مابيسوا شي.. المترجم لازم يكون عندو وسط ومحيط معروف فيه لحتى العالم توثق فيه وتسلمو أعمال يترجمها ..
#مهنة_الترجمة بدها #أخلاق و #تعاون لهيك استغلوا فرصة دراستكن ورفقاتكن واعملوا غروبات تعاهدوا فيها على صداقتكن ... البلد حاليا بحالة ركود بكل الجوانب لكن بكرا ((إنشالله)) إذا رجعت المؤتمرات ورجعت السفارات حتعرفوا أديش مهمة هالعلاقات الي عم احكي عنها..
وبهالمناسبة السعيدة #فريق_أكاديمستس بحاجة ل #متطوعين #أدمنز ينقلولنا #الأخبار_الأسبوعية عن الجامعة كرمال نشيرهن مع بقية الطلاب #كعمل_تطوعي ورح نحاول نعطيكن #شهادات_تطوعية للملتزمين معنا.
ملحوظة: الصورة بالبوست من عام 2014 كنا سنة تالتة عمندرس أنا ورفقاتي أدبية1 لما كان اسمها مقبرة الجامعة ههههههههههه منشنوا لرفقاتكن الي تعرفتوا عليهن من خلال قسم الترجمة وعبرولن عن امتنانكن بهالصداقة الجميلة للحفاظ عليها
مع تمنياتي للجميع بالنجاح والتوفيق