Summary of first year subjects

blog-year1-1
ملخص مواد السنة الأولى كاملة 
أولاً : متل ما اتفقنا انو هنن 5 مواد و بيختلف المطلوب بالمادة من دكتور لدكتور  وكل دكتور له أسلوبه الخاص  بالإعطاء وكذلك بيختلف نموذج الإمتحان حسب الدكتور (يعني كل دكتور بيحدد المطلوب للمادة و بيكون له أسلوب بكتابة أسئلة الامتحان )
مواد الفصل الأول : (العربي ، الغرامر، الترجمة، قراءة وفهم1 ، والثقافة1)
#العربي (مؤتمتة) : مادة سهلة جداً، وفي كتير طلاب بخافوا منها، بس بحب طمنكن إنو هالمادة معلوماتها كلها معروفة و سهلة  ومرت معكن بسنوات الدراسة بالمراحل الاعدادية والثانوية، و أكيد رح تقدروا تتجاوزوها بدون صعوبات ...
#النحو انكليزي ( مؤتمتة) : أولاً لنتفق انو النحو انكليزي هي مادة غرامر و كل الطلاب بقولوا عنا غرامر 1 لأن في بالفصل الثاني في مادة غرامر2 وهي عبارة عن قواعد باللغة الإنكليزية، وبتطّلب تركيز منيح، ويلي ببلش مع دكتورنا العظيم "عمار صندوق " من أول السنة، بيقدر يطالع المادة بمعدل عالي، وبنصح بحضورها، لأن محاضرة هالدكتور ما بتتفوت، وبالنسبة للإمتحان أغلب الاسئلة بتكون تحديد نوع الجمل يلي بيختارها الدكتور، وأنتو بنصحكن تحفظو امثلة كل قاعدة، مشان تعرفو تميزو كل مثال هو لأي قاعدة  و نصيحة أيضاً انو لا تدرسوا هل المادة على أنها مادة لرفعا و بس بالعكس استغلوها بطريقة احترافية و أسسوا حالكن بالغرامر و خاصة مع أعظم دكتور بالجامعة الدكتور "عمار صندوق"
#ترجمة(مؤتمتة) : هي مادة أول شي بتعتمد على كم المفردات يلي عند الطالب، لأن هي مادة بتعلم الطالب كيفية الترجمة، وبيدرب من خلالها على نصوص ممكن تكون ضمن الكتاب وممكن تكون خارجية، والأسئلة بالإمتحان بتكون عبارة عن نصوص انكليزية وانتو بدكن تختارو ترجمة الكلمات المحددين عليها..و النصيحة لهل المادة انو لا تستخفوا بأي مفردة جديدة بالإضافة إلى الانتباه للزمن المستخدم بالنصوص لحتى تبلشوا صح و يصير عندكن انتباه للنص بكل تفاصيلو ..
#القراءة و الفهم (مؤتمتة) : مادة ممتعة جداً، وكلها قصص بالكتاب، ومن خلالها بتدرسو معاني الكلمات، وترجمتن من الانكلش للانكلش، و بهل المادة بصير عندكن مخزون مفردات جديدة و بيكون الامتحان نص وعليه أسئلة مختلفة (شي بيشبه أسئلة البكلوريا نوعاً ما )و متل ما حكينا انو كل دكتور و الو أسلوبو ..
#الثقافة (مؤتمتة) : مادة بتحكي عن العصور القديمة، وهي عبارة عن نصوص تاريخية، و بصحكن انو تمشوا بالدراسة أول بأول و بيحفظ المفردات أيضاً بتترفع معكن المادة برياحة هي المادة تعتبر حفظية نوعاً ما
مواد الفصل الثاني : ( العربي، غرامر ، ترجمة، قراءة وفهم2 ، ثقافة2)
#عربي(مؤتمتة) : بتشبه كتير العربي فصل أول ومعلوماتها كل مارقة معكن من قبل ، هي المادة عبارة عن دروس عن أساسيات العربي الجموع والأفعال والمشتقات واعرابات مفردات وجمل وماإلى ذلك و امتحانها عبارة عن قصيدة شعرية عليها أسئلة وتطبيقات وهالمرة بتكون لآخر مرة بتقدموها أتمتة
#النحو انكليزي (مؤتمتة) : كمان عبارة عن قواعد باللغة الانكليزية، وتعتبر أسهل من غرامر1 و أكيد متل ما حكينا أنو لازم تاسسوا حالكن بالغرامر ، هي المادة عبارة عن أساسيات باللغة الانكليزية بتبلشوا دراسة أشكال ال noun وبعدا كيفية التعامل معهن باستخدام كلشي بيجي معهن من Articles و بعدا بتدرسوا Adjectives و adverbs وبعدن عنكن وحدة ال gerund وفي وحدة كاملة لأحرف الجر مهمة جدا والوحدة السادسة عن multi word verbs وآخر وحدتين عن الكلمات والمصطلحات و المادة رح تعتمد على أسلوب الدكتور بالإضافة لأساسكن بالانكلش وطبعا غالباً بيحذفوا منها لأنو مابيلحقوها كلا بالفصل
#ترجمة (مؤتمتة) : هي المادة عبارة عن نصوص مطلوب ترجمتها سواء من الانكلش للعربي أو العكس ورح يكون عنكن براكتيس داخل المحاضرة لازم تحلوا وتتفاعلوا مع الدكتور لتحصلوا على أكبر فائدة ممكنة وهي المادة بالذات بتعتمد على الطالب أكتر من الدكتور بكتير لازم تترجموا كل يوم ولو سطرين لتتطور ترجمتكن وتكونوا أسلوب خاص فيكن كمترجمين وتجمعوا كلمات ومصطلحات بكل المجالات
الامتحان عبارة عن نصين الأول عربي والتاني انكلش ويسمع باستخدام القاموس انكليزي انكليزي بالامتحان
((طبعاَ وأحيانا بيمنع استخدام القاموس وأحيانا لأ هدا الحكي جديد))
#القراءة و الفهم (مؤتمتة) : نفس نمط القراءة فصل أول، عبارة عن نصوص وتعتبر متل قصص ، هي المادة عبارة عن نصوص انكلش عليها تمارين للحل ومفردات بالانكلش ومعانيها بقلب النص بالانكلش كمان
الثقافة2 (مؤتمتة) : المادة عبارة نصوص قديمة وفيها حفظ مفردات كتير ، و هي  مادة نظرية بامتياز ولازم تحفظوها حفظ بصم بتحكي عن العالم العربي الإسلامي وعن نشأة الإسلام وظهور الرسول محمد صلى الله عليه وسلم من وجهة نظر أوربية يعني بتحكي الحياة والفكر والثقافة العربية ولكن بنظرة غربية مومتل ثقافة 1 عن العصور الوسطى ولهيك حتلاقوها أسهل من ثقافة 1 وبتحكي عن تحرر المرأة ومين أول من قامت بهاد الدور وعن أدباء وأسماؤن وأسماء كتبهن وبيجي منهن كتير بالامتحان بآخر وحدة الي عنوانها التغييرات الحاصلة في المجتمعات العربية.
 مع تمنيات فريق ACADEMISTS لكم بالتوفيق و النجاح 

© Copyright 2024. Made with Love by VOILA